கண்ணான கண்ணே - விஸ்வாசம்

---

இசை : டி.இமான்	பாடல் : தாமரை
குரல்கள் : சித் ஸ்ரீராம்	வருடம் : 2018

---

கண்ணான கண்ணே கண்ணான கண்ணே
என் மீது சாயவா
புண்ணான நெஞ்சை பொன்னான கையால்
பூ போல நீவ வா
நான் காத்து நின்றேன் காலங்கள் தோறும்
என் ஏக்கம் தீருமா
நான் பார்த்து நின்றேன் பொன் வானம் எங்கும்
என் மின்னல் தோன்றுமா
தண்ணீராய் மேகம் தூறும்
கண்ணீர் சேரும்
கற்கண்டாய் மாறுமா

ஆராரிராரோ ராரோ ராரோ ஆராரிராரோ
ஆராரிராரோ ராரோ ராரோ ஆராரிராரோ
ஆராரிராரோ ராரோ ராரோ ஆராரிராரோ
ஆராரிராரோ ராரோ ராரோ ஆராரிராரோ

கண்ணான கண்ணே கண்ணான கண்ணே
என் மீது சாயவா
புண்ணான நெஞ்சை பொன்னான கையால்
பூ போல நீவ வா

அலைகடலின் நடுவே
அலைந்திடவா தனியே
படகெனவே உனையே பார்த்தேன் கண்ணே
புதை மணலில் விழுந்தே
புதைந்திடவே இருந்தேன்
குறுநகையை எறிந்தே மீட்டாய் என்னை
விண்ணோடும் மண்ணோடும் ஆடும் பெரும் ஊஞ்சல் மனதோரம்
கண்பட்டு நூல்விட்டுப் போகும் என ஏதோ பயம் கூடும்
மயில் ஒன்றைப் பார்க்கிறேன்
மழையாகி ஆடினேன்
இந்த உற்சாகம் போதும்
சாகத் தோன்றும் இதே வினாடி

கண்ணான கண்ணே கண்ணான கண்ணே
என் மீது சாயவா
புண்ணான நெஞ்சை பொன்னான கையால்
பூ போல நீவ வா
நீ தூங்கும் போது முன் நெற்றி மீது
முத்தங்கள் வைக்கணும்
போர்வைகள் போர்த்தி போகாமல் தாழ்த்தி
நான் காவல் காக்கணும்
எல்லோரும் தூங்கும் நேரம்
நானும் நீயும் மௌனத்தில் பேசணும்

ஆராரிராரோ ராரோ ராரோ ஆராரிராரோ
ஆராரிராரோ ராரோ ராரோ ஆராரிராரோ
ஆராரிராரோ ராரோ ராரோ ஆராரிராரோ
ஆராரிராரோ ராரோ ராரோ ஆராரிராரோ

கண்ணான கண்ணே... கண்ணான கண்ணே...

தென்றலே தென்றலே - காதல் தேசம்

---

இசை : ஏ.ஆர்.ரகுமான்	பாடல் :
குரல்கள் : உன்னிகிருஷ்ணன் - மனோ	வருடம் : 1996

---

தென்றலே தென்றலே மெல்ல நீ வீசு
பூவுடன் மெல்ல நீ பேசு
தென்றலே தென்றலே மெல்ல நீ வீசு
பூவுடன் மெல்ல நீ பேசு
கரையின் மடியில் நதியும் தூங்கும்
கவலை மறந்து நீ தூங்கு
இரவின் மடியில் உலகம் தூங்கும்
இனிய கனவில் தூங்கு

( தென்றலே தென்றலே...

காதல் என்றால் கவலையா
கண்ணில் நீரின் திவலையா
நோயானேன் உயிரும் நீயானேன்
இரவில் காயும் முழுநிலா
எனக்கு மட்டும் சுடும்நிலா
வாராயோ எனை நீ சேராயோ
தூங்கவைக்கும் நிலவே
தூக்கமின்றி நீ ஏன் வாடினாயோ...

( தென்றலே தென்றலே...

மாலைவானில் கதிரும் தூங்கும்
மடியில் சாய்ந்து தூங்கு
பூமியாவும் தூங்கும் போது
பூவை நீயும் தூங்கடா
மலரின் காதல் பனிக்குத் தெரியும் – என்
மனதின் காதல் தெரியுமா
சொல்ல வார்த்தைக் கோடிதான் – உனை
நேரில் கண்டால் மௌனமேன்
தூங்கவைக்கப் பாடினேன் – நான்
தூக்கமின்றி வாடினேன்

( தென்றலே தென்றலே...

அழகு நிலவே - பவித்ரா

---

இசை : ஏ.ஆர்.ரகுமான்	பாடல் :
குரல்கள் : சித்ரா	வருடம் : 1994

---

அழகு நிலவே கதவு திறந்து அருகில் வந்தாயே
எனது கனவை உனது விழியில் எடுத்து வந்தாயே
ஒரு பாலைவனமாய் கிடந்த வயிற்றில் பாலைவார்த்தாயே
என் பாதிஉயிரை திருப்பித் தரவே பறந்து வந்தாயே
இந்த பாவி உன்னைச் சுமந்ததில்லை நானும் உன் தாயே...

( அழகு நிலவே கதவு...

சொந்தங்கள் என்பது தாய் தந்தது - இந்த
பந்தங்கள் என்பது யார் தந்தது
இன்னொரு தாய்மைதான் நான் கண்டது - அட
உன்விழி ஏனடா நீர் கொண்டது
அன்புதான் தியாகமே அழுகைதான் தியானமே
உனக்கும் எனக்கும் உள்ள உறவு ஊருக்குப் புரியாதே...

( அழகு நிலவே கதவு...

பூமியை நேசிக்கும் வேர்போலவே - உன்
பூமுகம் நேசித்தேன் தாயாகவே
நீருக்குள் சுவாசிக்கும் மீன்போலவே - உன்
நேசத்தில் வாழுவேன் நானாகவே
உலகம் மாறுமே உறவுகள் வாழுமே
கடலைவிடவும் ஆழம் எந்தன் கண்ணீர்த்துளி ஒன்றே...

( அழகு நிலவே கதவு...

ஒரு தெய்வம் தந்த பூவே - கன்னத்தில் முத்தமிட்டால்

---

இசை : ஏ.ஆர்.ரகுமான்	பாடல் : வைரமுத்து
குரல்கள் : சின்மயி	வருடம் : 2000

---

ஒரு தெய்வம் தந்த பூவே
கண்ணில் தேடல் என்ன தாயே
ஒரு தெய்வம் தந்த பூவே
கண்ணில் தேடல் என்ன தாயே
வாழ்வு தொடங்கும் இடம் நீதானே
வானம் முடியும் இடம் நீதானே
காற்றைப்போல நீ வந்தாயே
சுவாசமாகி நீ நின்றாயே
மார்பில் ஊரும் உயிரே


( ஒரு தெய்வம் தந்த...

எனது சொந்தம் நீ எனது பகையும் நீ
காதல் மலரும் நீ கருவில் முள்ளும் நீ
செல்ல மழையும் நீ சின்ன இடியும் நீ
செல்ல மழையும் நீ சின்ன இடியும் நீ
பிறந்த உடலும் நீ பிரியும் உயிரும் நீ
மரணம் ஈன்ற ஜனனம் நீ....

( ஒரு தெய்வம் தந்த...

எனது செல்வம் நீ எனது வறுமை நீ
இழைத்த கவிதை நீ எழுத்துப் பிழையும் நீ
இரவல் வெளிச்சம் நீ இரவின் கண்ணீர் நீ
இரவல் வெளிச்சம் நீ இரவின் கண்ணீர் நீ
எனது வானம் நீ இழந்த சிறகும் நீ
எனது வானம் நீ இழந்த சிறகும் நீ
நான் தூக்கி வளர்த்த துயரம் நீ....

( ஒரு தெய்வம் தந்த...

கருப்பு நிலா-என் ஆசை மச்சான்

---

இசை : இளையராஜா	பாடல் : கவிஞர் வாலி
குரல்கள் : சித்ரா	வருடம் : 1994

---

கருப்பு நிலா... கருப்பு நிலா...

கருப்பு நிலா நீதான் கலங்குவதேன்
துளித்துளியா கண்ணீர் விழுவதேன்
கருப்பு நிலா நீதான் கலங்குவதேன்
துளித்துளியா கண்ணீர் விழுவதேன்

சின்ன மானே மாங்குயிலே – உன்
மனசுல என்ன குறை
பெத்த ஆத்தா போலிருப்பேன்
இந்த பூமியில் வாழும்வரை
எட்டு திசையாவும் கட்டி அரசாள
வந்த ராசா நீதானே...

பத்து மாசம் மடியேந்தி பெத்தெடுத்த மகராசி
பச்சபுள்ள உன்ன விட்டு போனதெண்ணி அழுதாயா
மாமன் வந்து எனைக்காக்க நானும் வந்து உனைக்காக்க
நாம் விரும்பும் இன்பம் எல்லாம் நாளைவரும் நமக்காக
காலம் உள்ள காலம் வாழும் இந்த பாசம்
பூவிழி இமைமூடியே சின்ன பூவே கண்ணுறங்கு


( கருப்பு நிலா நீதான்...

வண்ண வண்ண முகம்காட்டி வானவில்லின் நிறம்காட்டி
சின்னச் சின்ன மழலைபேசி சித்திரம் போல் மகனே வா
செம்பருத்தி மலர்போலே சொக்கவெள்ளி மணிபோலே
கன்னம்ரெண்டும் மின்ன மின்ன கண்மணியே மடிமேல் வா
பாட்டு தமிழ்பாட்டு ஆடு அதை கேட்டு
ஆடிடும் விளையாடிடும் தங்கத்தேரே நீதானே...

( கருப்பு நிலா நீதான்...

மன்னவா மன்னவா - வால்ட்டர் வெற்றிவேல்

---

இசை : இளையராஜா	பாடல் : கவிஞர் வாலி
குரல்கள் : சுனந்தா	வருடம் : 1993

---

மன்னவா மன்னவா மன்னாதி மன்னன் அல்லவா - நீ
புன்னகை சிந்திடும் சிங்கார கண்ணன் அல்லவா
மழலைகள் யாவும் தேனோ மரகத வீணை தானோ
மடிமேலே ஆடும் பூந்தேரோ ..
அன்னை மனம்தான் பாடும் ஆராரோ…

( மன்னவா மன்னவா...

நாள்தோறும் காவல் நின்று நமை காக்கும் தந்தை உண்டு
இந்த வாழ்வு என்பது அந்த தெய்வம் தந்தது
ராஜாதி ராஜன் இன்று பலதேசம் நீயும் வென்று
வரவேண்டும் கண்மணி வெற்றிவேலின் பிள்ளை நீ
தென்மதுரை சீமையெல்லாம் அரசாளும் உன்னைக் கண்டு
திருத்தோளில் மாலைசூடும் மகராணி யாரோ இங்கு
ஒளிவிடும் எதிர்காலம் ஒன்று
உருவாகும் நாளை இங்கு
பனிவாய் மலரே மடிமேல் உறங்கு...

( மன்னவா மன்னவா …

மீனாட்சி கையில் கொண்டு அருள்கூறும் கிள்ளை ஒன்று
உருமாறி நின்றதோ எந்தன் மகனாய் வந்ததோ
காமாட்சி கோயில் கண்டு சுடர் வீசும் தீபம் ஒன்று
எந்தன் வீடு வந்ததோ பிள்ளை வடிவாய் நின்றதோ
உன்னை ஒரு ஈயும் மொய்த்தால் உருகாதா தாயின் சித்தம்
விழியோரம் நீரைக் கண்டால் கொதிக்காதா அன்னை ரத்தம்
உனக்கொரு குறை நேர்ந்திடாது
வளர்ப்பேனே தோளின் மீது
பனிவாய் மலரே மடிமேல் உறங்கு…

( மன்னவா மன்னவா …

பொம்முக்குட்டி அம்மாவுக்கு - என் பொம்முக்குட்டி அம்மாவுக்கு

---

இசை : இளையராஜா	பாடல் : கவிஞர் வாலி
குரல்கள் : கே.ஜே.ஏசுதாஸ்	வருடம் : 1988

---

பொம்முக்குட்டி அம்மாவுக்கு ஆராரோ...
தங்கக்கட்டி பாப்பாவுக்கு தாலேலோ...
வாராமல் வந்த செல்வம்
வீடேறி வந்த தெய்வம்
தேடாமல் தேடி வந்த தாழம்பூச்சரம்

ரெண்டு தாய்க்கொரு பிள்ளை
என்று வாழ்ந்திடும் முல்லை
உன்னை யார் சுமந்தாரோ
உண்மை நீ அறிவாயோ (2)

உன்னை நினைத்து உருகிடும் மாது
உன்னை பிரிய மனம் துணியாது
பூவே பனிப்பூவே நீதான் இல்லாது
பார்வை எங்கள் பார்வை தூக்கம் கொள்ளாது
ஆராரோ ஆராரோ ஆரோ ஆரோ ஆராரோ...

( பொம்முக்குட்டி …

பெற்ற தாய்படும் பாடு
பிள்ளை தானறி யாது
இது காக்கையின் கூடு
இங்கே பூங்குயில் பேடு  (2)

வந்த உறவை இவள் விடுவாளோ
சொந்த உறவை அவள் தருவாளோ
பாசம் உயிர்நேசம் வாழும் நெஞ்சோடு
பாடும் உறவாடும் ஜீவன் உன்னோடு
ஆராரோ ஆராரோ ஆரோ ஆரோ ஆராரோ...

( பொம்முக்குட்டி …

கற்பூர பொம்மை ஒன்று – கேளடி கண்மணி

---

இசை : இளையராஜா	பாடல் : மேத்தா
குரல்கள் : பி.சுசீலா	வருடம் : 1990

---

கற்பூர பொம்மை ஒன்று கைவீசும் தென்றல் ஒன்று
கற்பூர பொம்மை ஒன்று கைவீசும் தென்றல் ஒன்று
கலந்தாட கைகோர்க்கும் நேரம்
கண்ணோரம் ஆனந்த ஈரம்
முத்தே என் முத்தாரமே சபையேறும் பாடல்
நீ பாடம்மா நீ பாடம்மா

( கற்பூர பொம்மை...

பூந்தேரிலே நீ ஆடவே
உண்டான அன்பே ஒரு ராஜாங்கம்
ராஜாங்கமே ஆனந்தமே நம்வீடு இங்கே ஒரு சங்கீதம்
மானே உன் வார்த்தை ரீங்காரம்
மலரே என் நெஞ்சில் என்றும் நின்றாடும்
முத்தே என் முத்தாரமே சபையேரும் பாடல்
நீ பாடம்மா நீ பாடம்மா

( கற்பூர பொம்மை...

தாயன்பிற்கே ஈடேதம்மா
ஆகாயம் அட அது போதாது
தாய் போல யார் வந்தாலுமே
உன் தாயைப்போலே அது ஆகாது
என் மூச்சில் வாழும் புல்லாங்குழல்
உன் பேச்சு நாளும் செந்தேன்குழல்
முத்தே என் முத்தாரமே சபையேரும் பாடல்
நீ பாடம்மா நீ பாடம்மா

( கற்பூர பொம்மை...

அழகு குட்டிச்செல்லம் - சத்தம் போடாதே

---

இசை : யுவன்ஷங்கர் ராஜா	பாடல் : நா.முத்துகுமார்
குரல்கள் : சங்கர் மகாதேவன்	வருடம் : 2007

---

அழகு குட்டிச்செல்லம் உன்னை அள்ளித்தூக்கும் போது
உன் பிஞ்சு விரல்கள் மோதி
நான் நெஞ்சம் உடைந்து போனேன்
ஆளைக் கடத்தி போகும் உன் கன்னக்குழியின் சிரிப்பில்
விரும்பி மாட்டிக்கொண்டேன் நான் திரும்பி போகமாட்டேன்
அம்மு நீ என் பொம்மு நீ மம்மு நீ என் மின்மினி
உனக்குத் தெரிந்த மொழியிலே எனக்கு பேசத்தெரியலே
எனக்கு தெரிந்த பாஷை பேச உனக்கு தெரியவில்லை
இருந்தும் நமக்குள் இது என்ன புது பேச்சு
இதயம் பேச எதற்க்கிந்த ஆராய்ச்சி
சிஞ்சனிஞ்ச சிஞ்சனிஞ்ச சிஞ்சனி
மஞ்சனிஞ்சி மஞ்சனிஞ்சி மஞ்சரி

( அழகு குட்டிச்செல்லம்...

ரோஜாப்பூ கை ரெண்டும் காற்றோடு கதை பேசும்
உன் பின்னழகில் பௌர்ணமிகள் தகதிமிதா ஜதி பேசும்
எந்த நேரம் ஓயாத அழுகை ஏனிந்த முட்டிக்கால் தொழுகை
எப்போதும் இவன் மீது பால் வாசனை
என்ன மொழி சிந்திக்கும் இவன் யோசனை
எந்த நாட்டை பிடித்துவிட்டான்
இப்படியோர் அட்டினக்கால் தோரனை... தோரனை
சிஞ்சனிஞ்ச சிஞ்சனிஞ்ச சிஞ்சனி
மஞ்சனிஞ்சி மஞ்சனிஞ்சி மஞ்சரி

( அழகு குட்டிச்செல்லம்...

நீ தின்ற மண் சேர்த்தால் வீடொன்று கட்டிடலாம்
நீ சினுங்கும் மொழி கேட்டால் சங்கீதம் கற்றிடலாம்
தண்டவாளம் இல்லாத ரயிலை தவழ்ந்த படி நீ ஓட்டி போவாய்
வம்பு தும்பு செய்கின்ற பொல்லாதவன்
கடவுள் போல் கவலைகள் இல்லாதவன்
ஒளிந்து ஒளிந்து போக்கு காட்டி
ஓடுகின்ற கண்ணனே புன்னகை மன்னனே
சிஞ்சனிஞ்ச சிஞ்சனிஞ்ச சிஞ்சனி
மஞ்சனிஞ்சி மஞ்சனிஞ்சி மஞ்சரி

( அழகு குட்டிச்செல்லம்...